lunedì 22 aprile 2019

Su le ale bianche de la fantasia.





 Su le ale bianche de la fantasia
che drento mi de spesso l'è presente,
me son trovàda un giorno par magia
in un paese de altro continente.

O' visto gente alegra spensieràda
lì droga no ghe n'èra e gnàn briganti,
l'arieta l'èra pura e no inquinàda
più onesti i' èra anca i governanti.

Trà mi alor m'ò dito, ma che belo
saria sto vivar tuti in'armonia,
intanto i m'à ciamàdo dal tinelo
de boto son piombàda in casa mia.

Però me son promessa che ogni giorno
apena posso e sensa tante spese,
me meto quele ale e sgòlo intorno
fintanto che no rivo in quel paese.

Cossì par qualche ora e forsi più
mi sono felisse con le mie illusioni,
bisognarea spassiàr de spesso in sù
che forsi... Se diventarea più boni.

Zia Maria



Robert Hagan
Impressionista contemporaneo Australiano

Vecio capel.





Vecio capel de alpin, tacà a la porta,
maciado e desformà da tanti ani,
la pena nera spelaciada e storta,
te me ricordi sempre i me vintani.

Vecio capel, te meto qualche volta
quanto se se trova tuti insieme,
quei che è restado, quei che no l'ha "tolta"
quei che la vita g'ha lissià le pene.

Capel de alpin, ne la me testa vecia,
te porti cante mai desmentagà,
sento fis-ciar el vento ne la recia,
e vedo el sol che incendia monti e prà.

Quando te g'è el capel te pari mato,
i dise quei che no capisse gnente,
lori i no sa che l'è 'n capel fatato,
malà de nostalgia, fato de gnente.

Dòneme ancora sogni a capelade,
imbriàgheme de sogni e poesia
e fame amar la gente e le contrade
regàleme salute e fantasia.

Vecio capel, se moro te voi rente,
nei pascoli del ciel su qualche stela,
soldà dei monti, eterna sentinela,
in barba a quei che no capisse gnente.

Umberto Rossignolo